Skip to content

मालेगाव, शाहीन बागसह अनेक राज्यांत एनआयएचे छापे, अनेकांना अटक


मालेगाव : आज देशभरात धडाकेबाज कारवाई NIA व ATS ने केली असून यामुळे अनेकांचे धाबे दणाणले आहेत. टेरर फंडिंग प्रकरणी एनआयए आणि ईडीचे देशभरात छापेमारी सुरू आहे. दरम्यान, दिल्लीतून एक मोठी बातमी समोर येत आहे. पीएफआयचे अध्यक्ष परवेझ आणि त्याच्या भावाला येथून अटक करण्यात आली आहे. याशिवाय पीएफआयचे राष्ट्रीय सचिव व्हीपी नजरुद्दीन यांनाही ताब्यात घेण्यात आले आहे. एनआयएचे पथक त्यांना सोबत घेऊन गेले असल्याचे सांगण्यात आले. एनआयए देशातील 10 राज्यांमध्ये छापे टाकत आहे. यादरम्यान 100 हून अधिक जणांना ताब्यात घेण्यात आले आहे.

NIA चा सर्वात मोठा छापा
अधिकाऱ्यांनी सांगितले की छाप्यांदरम्यान एनआयए आणि ईडीने दहशतवाद्यांना पाठिंबा दिल्याच्या आरोपाखाली पॉप्युलर फ्रंट ऑफ इंडिया (PFI) च्या 100 हून अधिक कार्यकर्त्यांना ताब्यात घेतले. अधिकार्‍यांच्या मते, हे छापे प्रामुख्याने दक्षिण भारतात टाकले जात आहेत आणि एनआयएने याला “आतापर्यंतचे सर्वात मोठे तपास ऑपरेशन” म्हटले आहे. एनआयएने सांगितले की, दहशतवाद्यांना कथितपणे निधी पुरवणे, त्यांच्यासाठी प्रशिक्षणाची व्यवस्था करणे आणि प्रतिबंधित संघटनांमध्ये सामील होण्यासाठी लोकांना फसवणे यात गुंतलेल्या लोकांच्या लपलेल्या ठिकाणांवर छापे टाकले जात आहेत.

अधिकाऱ्यांच्या म्हणण्यानुसार, दहा राज्यांमध्ये छापे टाकले जात आहेत आणि यावेळी पीएफआयच्या प्रमुख नेत्यांसह सुमारे 100 कार्यकर्त्यांना ताब्यात घेण्यात आले आहे. पीएफआयने एक निवेदन जारी करून म्हटले आहे की, “पीएफआयच्या राष्ट्रीय, राज्यस्तरीय आणि स्थानिक नेत्यांच्या घरांवर छापे टाकले जात आहेत. राज्य समिती कार्यालयावरही छापे टाकण्यात येत आहेत. आंध्र प्रदेशातून 5, आसाममधून 9, दिल्लीतून 3, कर्नाटकातून 20, केरळमधून 22, मध्य प्रदेशातून 4 आणि महाराष्ट्रातून 20 जणांना अटक करण्यात आली आहे.

मध्य प्रदेशातील इंदूर आणि उज्जैन येथेही एनआयएचे छापे पडले असून त्यात पीएफआयच्या राज्य नेत्यांना ताब्यात घेण्यात आले आहे. यामध्ये एनआयएने मध्य प्रदेशातील उज्जैन आणि इंदूर येथून 4 नेत्यांना ताब्यात घेतले आहे. मध्य प्रदेशातील तळांवरून टेरर फंडिंग खाते आणि साहित्य जप्त करण्यात आले आहे.

महाराष्ट्रात ATS चा छापा
महाराष्ट्र एटीएसने पीएफआयविरुद्ध चार स्वतंत्र गुन्हेही दाखल केले आहेत. महाराष्ट्र एटीएसचे छापे देखील आज संपूर्ण राज्यात सुरू असून त्यात औरंगाबाद, बीड, परभणी पर्व, मालेगाव, मुंबई आणि नवी मुंबईचा समावेश आहे. एटीएसने दिलेल्या माहितीनुसार, 20 जणांना ताब्यात घेण्यात आले आहे. मौलाना सैफुर रहमान याला मालेगाव येथून ताब्यात घेण्यात आले आहे. सैफुर रहमान हे पीएफआयचे नाशिक जिल्हा अध्यक्ष आहेत.

या छाप्याबाबत पीएफआयने म्हटले आहे की, “आम्ही निषेधाचा आवाज दाबण्यासाठी फॅसिस्ट राजवटीने केंद्रीय एजन्सीच्या गैरवापराचा तीव्र विरोध करतो.” सध्या पीएफआयचे नेते आणि सदस्यांच्या अटकेची फेरी सुरू आहे.


The Point Now न्यूजचे अपडेट्स मिळवण्यासाठी आम्हाला फॉलो करा

फेसबुकट्विटरयुट्युबइंस्टाग्राम

Don`t copy text!