ब्रेकिंग | नाशकात वातावरण तापलं! भुजबळांचा ताफा जाताच गावकऱ्यांनी गोमुत्र शिंपडलं

मराठा समाजाने केला तीव्र विरोध

अवकाळी पावसामुळे शेतीचं मोठं नुकसान झालेलं आहे. पिकांचं मोठं नुकसान झालं आहे. अशात मंत्री छगन भुजबळ हे नाशिक जिल्ह्यातील नुकसानग्रस्त भागाची पाहणी करता आहेत. या पाहणी दरम्यान छगन भुजबळ यांना मराठा आंदोलकांच्या विरोधाला सामोरं जावं लागलेलं आहे. मराठा आंदोलकांनी ठिकठिकाणी आंदोलन करत छगन भुजबळांचा निषेध नोंदवला आहे.

मंत्री छगन भुजबळ यांचा हा पाहणी दौरा संपल्यानंतर ज्या रस्त्यावरून छगन भुजबळ परतले त्याच रस्त्यावर मराठा आंदोलकांनी गोमूत्र शिंपडलेलं आहे. सोमठानदेश इथे पाहणी दौरा आटोपून मंत्री भुजबळ परतले. तेव्हा त्या रस्त्यावर गोमुत्र शिंपडण्यात आलेलं आहे. दौरा आटोपून भुजबळ परतीच्या प्रवासाला निघालेले असतांना आंदोलकांनी पुन्हा जोरदार घोषणाबाजी केली. अर्धनग्न होत आंदोलकांनी काळे शर्ट फिरवत मंत्री छगन भुजबळांचा निषेध केला. यावेळी छगन भुजबळ ‘गो बॅक’च्या घोषणा देण्यात आल्या.

Yeola | ‘जमीनीचा ७/१२ आमच्या बापाचा’; भुजबळांच्या येवला दौऱ्याला मराठ्यांचा विरोध

लासलगावातील कोटमगाव रेल्वे पुलाजवळ मराठा समाज आक्रमक झालेला आहे.  यावेळी ‘छगन भुजबळ गो बॅक’ च्या पाट्या हातात घेवून मराठा आंदोलक घोषणाबाजी करत आहेत. लासलगाव जवळील कोटमगाव इथे नुकसानग्रस्त पाहणी दौऱ्याआधीच भुजबळांना विरोध करण्यात येतो आहे. ‘भुजबळ गो बॅक’ चे पोस्टर रेल्वे पुलाच्या भिंतीला चिकटवलेले आहेत. रस्त्याचे आणि पाण्याचे काम होत नसल्याने लासलगावमधील ग्रामस्थ संतप्त झालेले आहेत. आश्वासने नकोत तर कामं करा…, असं म्हणत या ग्रामस्थांनी ताफा थांबवून मंत्री छगन भुजबळांना निवेदन दिलेलं आहे.