सिन्नर: तालुक्यातील जायगाव- ब्राम्हणवाडे रोडवर उभ्या ट्रकला अचानक आग लागली. या आगीत ट्रक भस्मसात झाला.
ही घटना शुक्रवारी (3 जून) मध्यरात्रीच्या सुमारास घडली असून, घटनेमुळे एकच खळबळ उडाली आहे. या ट्रकला आग लागण्याचे कारण मात्र, समजू शकले नाही.
याबाबत सविस्तर वृत्त असे की, सचिन संपत नागरे यांचा हा ट्रक असून, मध्यरात्री एकच्या सुमारास घराबाहेर आगीचे लोट दिसू लागल्याने नागरे कुटुंबीयांना जाग आली. त्यांनी घाईघाईने घराबाहेर येऊन पाहिले असता दहा चाकी उभा ट्रक (नं. MH-15-CK-2122 ) आगीच्या भक्ष्यस्थानी सापडला होता. त्यांनी याबाबत सिन्नर नगर परिषदेच्या अग्निशमन विभागाला माहिती दिली. त्यानंतर चालक नवनाथ जोंधळे, फायरमन लाला वाल्मिकी, जयेश बोरसे, लक्ष्मण सोनकुसरे आदींच्या पथकाने घटनास्थळी धाव घेतली. सुमारे दोन ते अडीच अडीच तासाच्या प्रयत्नानंतर आग आटोक्यात आली. मात्र ट्रक संपूर्ण जळून खाक झाला. आगीचे कारण समजू शकले नाही. पोलिसांनाही घटनेची माहिती देण्यात आली आहे.
The Point Now न्यूजचे अपडेट्स मिळवण्यासाठी आम्हाला फॉलो करा
फेसबुक । ट्विटर । युट्युब । इंस्टाग्राम
