नाशिकच्या चर्चमध्ये फादरचा आत्महत्येचा प्रयत्न

नाशिक : नाशिकच्या शालिमार परिसरातील सेंट थॉमस चर्चमध्ये आज (रविवार, ता.१९) सकाळी फादर अनंत आपटे यांनी स्वतःच्या अंगावर पेट्रोल टाकून जाळून घेत चर्चमध्ये आत्महत्याचा प्रयत्न केला. या घटनेमुळं परिसरात एकच खळबळ उडाली. स्वत:ला जाळून घेण्याच्या प्रयत्नात फादर आपटे १० टक्के भाजले असून सध्या त्यांच्यावर नाशिकच्या जिल्हा रुग्णालयात उपचार सुरू आहेत.

आपटे यांच्यावर गैरव्यवहाराचे आरोप करण्यात आले होते. त्यानंतर त्यांची धार्मिक प्रांत अंतर्गत एका समितीमार्फत चौकशी सुरू करण्यात आली आहे. मात्र, आपटे यांची बाजू बिशप हे ऐकून घेत नसल्यच्या आरोपावरून हे कृत्य केले असावे, अशी माहिती पोलिसांच्या प्राथमिक तपासात समोर आली आहे. या प्रकरणी पोलीस पुढील तपास करत आहेत. बिशप शरद गायकवाड यांच्यावर काही दिवसांपूर्वीच सामाजिक बहिष्कृत कायद्याअंतर्गत उपनगर पोलीस ठाण्यात गुन्हा दाखल करण्यात आला होता आणि आता या दुसऱ्या घटनेमुळे नाशिक धार्मिक प्रांतचा कारभार हा चर्चेचा विषय ठरला आहे.

‘माझ्यावर खूप मोठा अन्याय झाला आहे. सेंट थॉमस चर्चच्या कमिटीनं माझ्यावर खोटे आरोप केले. माझ्यावर दडपण आणलं. दोन वर्षे माझा मानसिक छळ झाला. या सगळ्या गोष्टी मी वेळोवेळी माझे वरिष्ठ रेव्हरंड शरद गायकवाड यांच्या कानावर घातल्या होत्या. पण माझं कुठलंही म्हणणं ऐकून न घेता त्यांनी माझ्यावर कारवाई केली. त्यामुळं नैराश्यातून मी आज हे पाऊल उचललं,’ असं जखमी फादर अनंत आपटे यांनी सांगितलं.