कंत्राटी ग्रामसेवकाचा कारनामा; सुटीच्या दिवशी चेनस्नॅचिंग

नाशिक : बेरोजगारीमुळे तरुण गुन्हेगारीसारख्या मार्गांकडे वळाल्याचे आतापर्यंत अनेकदा समोर आले आहे. परंतु, ग्रामसेवक असताना आठवडा सुटीच्या दिवशी चेनस्नॅचिंगचा ‘साइड बिझनेस’ करणाऱ्या एका कंत्राटी ग्रामसेवकास सर्वसामान्य नागरिकांच्या मदतीने गंगापूर पोलिसांनी बेड्या ठोकल्या. सुशिक्षित कुटुंबातील या ग्रामसेवकाने पाच महिलांच्या गळ्यातील सोने तोडून नेल्याची कबुली दिली आहे. या धक्कादायक प्रकारामुळे जिल्हा परिषदेत एकच खळबळ उडाली  आहे.

विपुल रमेश पाटील (२८, रा. अमृतधाम, आडगाव) असे गंगापूर पोलिसांनी अटक केलेल्या संशयित आरोपीचे नाव आहे. विशेषत: गंगापूर हद्दीत ठराविक दिवसांमध्ये चेन स्नॅचिंगच्या घटना घडत होत्या. या पार्श्वभूमीवर पोलिसांनी घटनास्थळावरील सीसीटीव्ही फुटेज तपासले. त्यात संशयित व त्याची दुचाकी दिसून आली. या एवढ्या एका पुराव्याच्या आधारे गंगापूर पोलिसांनी सुतावरून स्वर्ग गाठत आरोपीस बेड्या ठोकल्यात.

करोना काळात गंगापूर पोलीस ठाण्यामार्फत विशेष पोलीस अधिकाऱ्यांची नियुक्ती करण्यात आली होती. आता हे पद रद्द झाले असले तरी या सर्वसामान्य नागरिकांचा पोलिसांशी संपर्क असतो. त्यामुळे गंगापूर पोलिसांना मिळालेले व्हिडीओ फुटेज या माजी विशेष पोलीस अधिकाऱ्यांना पाहण्यासाठी दिले होते. ते पाहून एका विशेष पोलीस अधिकाऱ्याला १५ डिसेंबर रोजी सावरकरनगर भागात तसाच एक संशयित वाहन क्रमांक नसलेल्या प्लेजर स्कूटरवर फिरत असल्याचे दिसले. त्यांनी ही माहिती गंगापूर पोलिसांना कळवली. त्यानुसार, वरिष्ठ पोलीस निरीक्षक रियाज शेख यांनी गुन्हे शोध पथकाचे सहाय्यक पोलीस निरीक्षक सूर्यवंशी, उपनिरीक्षक संजय भिसे, हवालदार बोळे, पोलीस नाईक महाले, मोहिते, अंमलदार जाधव, जगताप, आणि भोये यांना संशयितास ताब्यात घेण्यासाठी रवाना केले. या पथकातील पोलीस नाईक सोळसे, पोलीस अंमलदार, जाधव यांनी आकाशवाणी टॉवर परिसरात पाटील यास ताब्यात घेतले.

११ तोळे सोने हस्तगत..

गंगापूर पोलिसांनी पाटीलकडे चौकशी केली. त्यात त्याने गंगापूर हद्दीत पाच गुन्हे केल्याची कबुली देत आपल्याकडील ११ तोळे सोने काढून दिले. ४ लाख ९४ हजार ८५९ किमतीच्या ११ तोळे वजनाच्या सोन्याच्या लगडी आणि २० हजार रुपयांची स्कूटर असा पाच लाख १४ हजार ८५९ रुपयांचा मुद्देमाल पोलिसांनी हस्तगत केला.

कंत्राटी ग्रामसेवक ते चेन स्नॅचर..

अनुकंपा तत्त्वावर कंत्राटी ग्रामसेवक म्हणून चांदवड तालुक्यात कार्यरत असलेला संशयित पाटील यापूर्वी गंगापूर हद्दीत चालक म्हणून कार्यरत होता. याबाबत पोलीस निरीक्षक रियाज शेख यांनी सांगतिले की, त्याच्यावर चौदा लाखांचे कर्ज आहे. तो विवाहित असून, त्याचे कुटुंब सुशिक्षित आहे. मात्र, कर्जाचा बोजा वाढत असल्याने त्याने चेन स्नॅचिंग करण्याचे ठरवले. दररोज तो चांदवडला असायचा. मात्र, सुटीच्या दिवशी तो गंगापूर हद्दीत येऊन चेन स्नॅचिंग करायचा. त्याला या भागातील रस्त्यांची माहिती होती. त्यामुळे तो पाच गुन्हे करू शकला. सध्या तो ताब्यात असून, त्याच्याकडे अधिक चौकशी सुरू असल्याचे त्यांनी स्पष्ट केले.

सर्वसामान्य नागरिकांनी सतर्कता दाखवून लागलीच पोलिसांशी संपर्क साधल्याने हा गुन्हा उघडकीस आला. यापूर्वी इंजिनिअर व उच्चशिक्षित आरोपींना या गुन्ह्यात अटक झाली. आता प्रथमच एक ग्रामसेवक हाती लागला. गंगापूर पोलिसांची कामगिरी नक्कीच उल्लेखनीय आहे.

-अमोल तांबे, पोलीस उपायुक्त