Agriculture News | यंदा कडधान्य आयातीमध्ये दुपटीहून अधिक वाढ

अनेक प्रयत्न करूनदेखील भारताला कडधान्य उत्पादनात स्वयंपूर्णता गाठता आलेली नाही. यंदा ‘एल निनो’चा फटका बसल्यामुळे कडधान्य उत्पादनावर मोठा परिणाम झाला आणि मागणीच्या तुलनेत कडधान्यांच्या पुरवठ्यात मोठा तुटवडा पडला. त्यामुळे आयातीला पाठबळ मिळाले तसेच चालू आर्थिक वर्षात एप्रिल ते सप्टेंबर या सहा महिन्यांमध्ये सुमारे १५ लाख टन कडधान्यांची आयात झाली. मागील हंगामात याच काळात आयात जवळपास ७ लाख टन इतकी होती. उरलेल्या काळात होणारी आयात लक्षात घेता यंदा देशात विक्रमी कडधान्य आयात होणार हे स्पष्ट झालेले आहे. आयात वाढल्याने भारताला अतिरिक्त डाॅलर्स खर्च करावे लागले आणि एप्रिल ते सप्टेंबर या सहामाहीत १५ लाख टन कडधान्य आयातीसाठी भारताला १२६ कोटी डाॅलर्स खर्च करावे लागले. तर मागील हंगामात याच काळातील ७ लाख टन आयातीसाठी ५९.५ कोटी डाॅलर्स खर्च करावे लागलेले होते.

मसूर आयातीत झाली तिप्पट वाढ

यंदा भारताने मसूर, तूर आणि उडीद आयात वाढवल्याने एकूण कडधान्य आयात वाढलेली दिसते आहे. विशेषतः मसूरची आयात जवळपास तिप्पट वाढलेली आहे आणि महत्त्वाचे म्हणजे मागील संपूर्ण आर्थिक वर्षात (२०२२-२३) मध्ये ८ लाख ५८ हजार टन मसुराची आयात झाली होती. म्हणजेच मागील वर्षभरात जेवढी मसूर आयात झाली जवळपास तेवढी आयात आपण यंदा पहिल्या सहामाहीत केली आहे.