Deola | देवळा येथे क्रिकेट खेळण्यासाठी गेलेल्या तरुणाचा हृदयविकाराने मृत्यू

सोमनाथ जगताप – प्रतिनिधी : देवळा | दहिवड (ता.देवळा) येथील २४ वर्षीय हरहुन्नरी क्रिकेटपटू आणि आरंभ ऑनलाइन सर्विसेस’चे संचालक यश सुनील अहिरे यांच्या आकस्मिक निधनाने गावात आणि तालुक्यात शोककळा पसरली आहे. यशने तालुक्यातील एका महत्त्वपूर्ण क्रिकेट सामन्यात आपल्या संघासाठी अप्रतिम फलंदाजी केली आणि संघाला विजयाच्या उंबरठ्यावर नेले. मात्र, दुर्दैवाने तो सामना त्याच्या आयुष्यातील शेवटचा ठरला. प्रजासत्ताक दिनी तालुक्यातील रणादेवपाडे येथील क्रिकेट सामन्यादरम्यान यशने आत्मविश्वासाने फटकेबाजी करत आपली फलंदाजीची चमक दाखवली. प्रेक्षकांनी त्याच्या या खेळीचे कौतुक करताना जोरदार प्रतिसाद दिला. मात्र तो बाद झाल्यावर मैदानाबाहेर बसल्यानंतर त्याला अस्वस्थ वाटू लागले.

Deola | कणकापूर येथील अपघातग्रस्त तरुणाचा उपचारादरम्यान मृत्यू

मित्रांनी तातडीने त्याला आधी मेशी येथे तर नंतर मालेगाव येथील रुग्णालयात दाखल केले. परंतु डॉक्टरांनी हृदयविकाराच्या तीव्र झटक्याने त्याचा मृत्यू झाल्याचे सांगितले. त्याच्या कुटुंबासाठी व सर्वच मित्रांसाठी हा मोठा धक्का होता. यशच्या या शेवटच्या सामन्याचा व्हिडिओ सध्या सोशल मीडियावर व्हायरल होत आहे. तो शेवटचे फटके मारताना आनंदी आणि उत्साहाने भरलेला दिसत होता. मात्र हा आनंद काही काळच टिकला. व्हिडिओ पाहणारे प्रत्येक जण त्याच्या या अशा एक्झिटने भावूक होत आहेत. यश हा केवळ क्रिकेटपटू नव्हता, तर दहिवड येथील ‘आरंभ ऑनलाइन सर्विसेस’ या सेवा केंद्राचा यशस्वी संचालकही होता. आपल्या कष्टाने आणि कल्पकतेने तो संपूर्ण तालुक्यात प्रसिद्ध झाला होता. गावकऱ्यांना विविध ऑनलाईन सेवा पुरवून त्यांची अनेकांची कामे त्याने सुलभ केली होती. त्याच्या या सेवाभावी वृत्तीने तो प्रत्येकाच्या मनात आपले स्थान निर्माण करू शकला.

दहिवडसह संपूर्ण तालुका आज यशच्या या दुर्दैवी घटनेमुळे शोकमग्न झाला आहे. मैदानावर शेवटच्या फटक्यांसह संघाला विजयाकडे नेणारा हा खेळाडू मैदानाबाहेर मात्र शेवटची झुंज हरला. यशच्या आईने अतिशय प्रतिकूल परिस्थितीत त्याचा सांभाळ करून त्याला मोठे केले. पण या अशा पद्धतीने त्याचे आकस्मिक निधन झाल्याने या माऊलीचा दुःखावेग मनाची कालवाकालव करणारा होता. सोमवार (दि.२७) रोजी दहिवड येथे त्याच्यावर अंत्यसंस्कार करण्यात आले. यावेळी शेवटचा निरोप देण्यासाठी तालुक्यातील युवावर्ग हळहळ व्यक्त करताना दिसला. यामुळे दहिवड गावातील व्यवहार बंद ठेवले होते.