महाराष्ट्रातील एकही गाव कर्नाटकात जाऊ देणार नाही – उपमुख्यमंत्री

महाराष्ट्राच्या सांगली जिल्ह्यातील जत तालुक्यावर कर्नाटक दावा सांगण्याचा महत्वपूर्ण विचार करत असल्याचं कर्नाटकचे मुख्यमंत्री बसवराज बोम्मई यांनी सांगितले. सांगली जिल्ह्यातील जत तालुका हा दुष्काळी आहे. तिथे पाण्याची तीव्र टंचाई भासते. यामुळे तिथल्या ४० ग्रामपंचायतींनी कर्नाटकात सामील होण्याचा ठराव केला आहे. याच ठरावावर कर्नाटक सरकार विचार करत आहे.
कर्नाटकच्या मुख्यमंत्र्यांच्या या वक्तव्यावर प्रतिक्रिया देताना राज्याचे उपमुख्यमंत्री देवेंद्र फडणवीस यांनी असे म्हटलं की “महाराष्ट्रातील एकही गाव कर्नाटकात जाऊ देणार नाही. पण सर्वोच्च न्यायालयात लढून बेळगाव, कारवार, निपाणीसह तिकडे असलेले गावं घेण्याचा आमचा प्रयत्न आहे,”. तसेच सांगलीच्या जतमधील गावांनी कर्नाटकात जाण्याचा ठराव २०१२ मधील आहे. आपण त्या गावांना पाणी देण्यासाठी आधीच म्हैसाळच्या सुधारित योजनेत घेण्याचा निर्णय घेतलेला आहे. असेही उपमुख्यमंत्र्यांनी सांगितले.
‘या सीमा वादाच्या प्रश्नावर महाराष्ट्राच्या मुख्यमंत्र्यांनी बैठक घेतल्यानंतर अतिशय महत्त्वपूर्ण निर्णय घेतले आहेत. त्यामुळे सीमा भागातील आपल्या लोकांना मदत करण्याचे आपण ठरवले आहे. त्यांच्यासाठी आधीच्या आणि काही नवीन योजना आपण पोहोचवत आहोत. त्यामुळे कर्नाटकच्या मुख्यमंत्र्यांनी असं वक्तव्य केलं असाव. एकही गाव महाराष्ट्रातलं कुठे जाणार नाही. पण आम्ही सर्वोच्च न्यायालयात लढून बेळगाव, कारवार, निपाणीसह जी आमची गावं आहेत ती आम्ही सर्व मिळवण्याचा प्रयत्न करणार आहोत.’, असे विधान उपमुख्यमंत्र्यांनी केले आहे.

जतमधील गावांचा ठराव हा २०१२ मधील आहे.
२०१२ मध्येच जतमधील गावांनी ठराव केला होता. आता नव्याने कोणत्याही गावाबाबत ठराव करण्यात आलेला नाही. आम्हाला पाणी मिळत नाही असं म्हणत त्यांनी तेव्हा असा ठराव केला होता. मी मुख्यमंत्री असताना कर्नाटकसोबत बोलणी केली होती आणि जिथे पाणी उपलब्ध आहे, तिथून पाणी देण्याचा निर्णय घेतला होता. त्यानंतर म्हैसाळच्या सुधारित योजनेतही त्या गावांना घेण्याचा निर्णय तत्कालीन जनसंधारण मंत्री गिरीश महाजन यांनी घेतला होता. आता त्या योजनेला आपण लवकरच मान्यता देण्यात येणार आहे. कोरोनामुळे अडीच वर्षात महाविकास आघाडी सरकार त्यास मान्यता देऊ शकली नसेल्याने ,आता मात्र तिथे पाणी पोहोचणार आहे. या सर्व योजनांसाठीचा निधी केंद्र सरकारकडून मिळाला असून पैशांची कुठलीही अडचण येणार नाही.