नाशिक प्रतिनिधी : महानगरपालिका बिगुल वाजले असून आगामी महानगरपालिका निवडणुकीच्या पार्श्वभूमीवर प्रभाग रचना जाहीर झाल्या आहेत, लवकरच निवडणुकीचे चित्र स्पष्ट होणार आहे. त्यादृष्टीने राष्ट्रवादी कॉंग्रेस पार्टीच्या पदाधिकारी कार्यकर्त्यांनी निवडणुकीच्या तयारीस सुरवात केली आहे.
भुजबळ म्हणाले की सर्वांची मते जाणून घेण्यात येत असून सन्मानपूर्वक आघाडीस प्राधान्य देण्यात येईल. मात्र आघाडी न झाल्यास स्वबळावर सर्व जागा लढण्याची देखील तयारी करण्यात येईल असे सांगत देशभरात भाजपची हवा आता ओसरली असून राष्ट्रवादी सह विरोधी पक्षांना पोषक वातावरण आहे.
आगामी महानगरपालिका निवडणुकीच्या पार्श्वभूमीवर मंत्री छगन भुजबळ यांनी राष्ट्रवादी पार्टीच्या महत्वाच्या पदाधिकाऱ्यांसमवेत राष्ट्रवादी भवन नाशिक येथील कार्यालयात आढावा बैठक घेऊन निवडणुकीच्या तयारीचा आढावा घेतला. त्यानंतर त्यांनी पत्रकारांशी संवाद साधला. त्यावेळी ते बोलत होते.
यावेळी भुजबळ म्हणाले की, लवकरच महानगरपालिका जिल्हा परिषदेसह स्थानिक स्वराज्य निवडणुका होणार आहे. त्या पार्श्वभूमीवर पक्षातील पदाधिकारी व कार्यकर्त्यांकडून आढावा घेण्यात येत आहे. आगामी निवडणुका लढताना भाजप वगळता समविचारी पक्ष व गटांशी आघाडी करण्यास आमचे प्राधान्य असणार आहे. मात्र सन्मानपूर्वक आघाडी न झाल्यास संपूर्ण जागांवर निवडणुका लढण्याची तयारी राष्ट्रवादी कॉंग्रेसच्या वतीने करण्यात येत असून प्रभागरचनेचा सूक्ष्म अभ्यास करून नागरिकांची मते जाणून घेतली जात असल्याचे त्यांनी सांगितले.
ते म्हणाले की, आपल्या कामकाजामुळे भाजपची हवा देशपातळीवरच कमी झालेली आहे. तसेच नाशिक महानगरपालिकेत भाजपच्या कामकाजामुळे नागरिकांमध्ये देखील जागृती असून शहरात देखील पूर्वीसारखी लाट राहिलेली नाही. महानगरपालिका निवडणुकीत राष्ट्रवादीला नागरिकांची पसंती असून पक्षाची शहरात ताकद देखील अधिक वाढली आहे. त्यानुसार निवडणुकीची तयारी करण्यात येत असून अधिक गतीने काम करण्याच्या सूचना देण्यात आल्याची माहिती भुजबळ यांनी दिली.
भुजबळ यांनी निवडणुकीच्या पार्श्वभूमीवर घेतलेल्या आढावा बैठकीत पदाधिकारी व कार्यकर्त्यांची मते जाणून घेतली. यावेळी विभागानुसार नेमण्यात आलेल्या सर्व पदाधिकाऱ्यांकडून केलेल्या कामकाजाचा आढावा घेतला. प्रभाग रचना जाहीर झाली असून त्याचा सूक्ष्म अभ्यास करून माहिती गोळा करण्यात यावी. आघाडी होवो ना होवो संपूर्ण जागांवर निवडणुका लढण्याची तयारी करावी. विभागवार जबाबदारी घेऊन निवडणुकीचे कामकाज करण्यात यावे. पक्ष अतिशय मजबुतीने उभा असून पदाधिकाऱ्यांनी ताकदीने कामाला सुरुवात करावी अशा सूचना त्यांनी पदाधिकाऱ्यांना दिल्या.
यावेळी माजी खासदार समीर भुजबळ, देविदास पिंगळे, आमदार सरोज आहिरे, माजी आमदार अपूर्व हिरे, माजी आमदार जयवंतराव जाधव, जिल्हाध्यक्ष अॅड.रवींद्र पगार, शहराध्यक्ष रंजन ठाकरे, प्रदेश पदाधिकारी नानासाहेब महाले, दिलीप खैरे, महापालिका गटनेते गजानन शेलार, डॉ.शेफाली भुजबळ, निवृत्ती अरिंगळे, बाळासाहेब कर्डक, शिवाजी सहाणे, नगरसेविका सुषमा पगारे, समिना मेमन, जगदीश पवार, सुफी जीन, महिला जिल्हाध्यक्ष प्रेरणा बलकवडे, महिला शहराध्यक्ष अनिता भामरे, युवक शहराध्यक्ष अंबादास खैरे, विद्यार्थी शहराध्यक्ष गौरव गोवर्धने, ओबीसीसेल जिल्हाध्यक्ष समाधान जेजुरकर, धनंजय निकाळे, सरचिटणीस संजय खैरनार, प्रांतिक सदस्य महेश भामरे, विभाग अध्यक्ष शंकर मोकळ, मकरंद सोमवंशी, मनोहर कोरडे, जीवन रायते, मुजाहित शेख, बाळसाहेब गिते, माजी मनपा विरोधी पक्षनेत्या कविता कर्डक, सुरेखा निमसे यांच्यासह प्रमुख पदाधिकारी उपस्थित होते.
The Point Now न्यूजचे अपडेट्स मिळवण्यासाठी आम्हाला फॉलो करा
फेसबुक । ट्विटर । युट्युब । इंस्टाग्राम
