मुंबई – गोकुळाष्टमीच्या खास मुहूर्तावर राज्यातील गोविंदाप्रेमींसाठी एक आनंदाची बातमी आहे. शिंदे सरकार लवकरच राज्यातील लोकप्रिय अशा ‘दहीहंडी’ उत्सवाला आता खेळाचा दर्जा देणार आहे. मुख्यमंत्री एकनाथ शिंदे यांनी तसा महत्वपूर्ण निर्णय घेतला आहे. याबाबत उद्या विधानसभेत घोषणा केली जाऊ शकते.
राज्याच्या क्रीडा विभागाची बुधवारी महत्वाची बैठक पार पडली. त्यात ‘दहीहंडी’ या उत्सवाचा साहसी खेळात समावेश करण्याचा निर्णय घेण्यात आला. तसेच राज्यात ‘प्रो कबड्डी’च्या धर्तीवर ‘प्रो दहीहंडी लीग’ सुरु होणार असल्याची माहिती क्रीडामंत्री गिरीश महाजन यांनी दिली.
गेल्या अनेक दिवसांपासून दहीहंडीला खेळाचा दर्जा देण्याची मागणी गोविंदा पथकांकडून केली जात होती. त्यातच काही दिवसांपूर्वी आमदार प्रताप सरनाईक यांनीही तशी मागणी करत दहीहंडीच्या दिवशी सार्वजनिक सुट्टी देण्याची विनंती मुख्यमंत्री एकनाथ शिंदे यांच्याकडे केली होती.
दहीहंडीचा क्रीडा प्रकारात समावेश करून ‛प्रो-गोविंदा' स्पर्धा चालू करण्याबाबतचे निवेदन आज मुख्यमंत्री @mieknathshinde साहेबांना दिले. याबाबत मा.मुख्यमंत्री व उपमुख्यमंत्री सकारात्मक निर्णय घेतील व 'प्रो गोविंदा'स्पर्धा सुरू होतील असा माझा विश्वास आहे.@Dev_Fadnavis #DahiHandi pic.twitter.com/KOsY8i4PJI
— Pratap Baburao Sarnaik (@PratapSarnaik) August 17, 2022
वर्षभर होणार आता दहीहंडीचे आयोजन
शिंदे-फडणवीस सरकारने काही दिवसांपूर्वीच दहीहंडीच्या दिवसाला सार्वजनिक सुट्टी जाहीर केली होती. त्यानंतर आता दहीहंडीला खेळाचा दर्जा देण्याचा ऐतिहासिक निर्णय घेण्यात आला, तशी अधिकृत घोषणा उद्या विधानसभेत होण्याची शक्यता आहे. शिंदे सरकारच्या या निर्णयामुळे वर्षातून एकच दिवस म्हणजे गोकुळाष्टमीला होणाऱ्या दहीहंडीचे आयोजन आता वर्षातील ३६५ दिवस करता येणार आहे. दहीहंडीसाठी मानवी मनोरे रचणारे ‘गोविंदा’ आता खेळाडू म्हणून ओळखले जातील.
The Point Now न्यूजचे अपडेट्स मिळवण्यासाठी आम्हाला फॉलो करा
फेसबुक । ट्विटर । युट्युब । इंस्टाग्राम
