मंत्री बच्चू कडू यांना ‘कारावास’ ; चांदूरबाजार न्यायालयाने सुनावली शिक्षा

मुंबई प्रतिनिधी : आक्रमक नेते म्हणून ज्यांची ओळख आहे असे राज्याचे महिला बालकल्याण व शिक्षण राज्यमंत्री बच्चू कडू यांना न्यायालयाने दोन महिने सश्रम कारावासाची शिक्षा सुनावली आहे. हा निर्णय चांदूरबाजार प्रथम वर्ग न्यायालयाने जाहीर केला असून याबाबत कडू काय निर्णय घेता याकडे लक्ष लागून आहे.

2014 च्या विधानसभा निवडणुकीत बच्चू कडू यांनी मुंबई येथील फ्लॅटबाबत माहिती लपवली. अशी तक्रार भाजपचे नगरसेवक गोपाल तिरमारे यांनी 2017 साली बच्चू कडू यांच्याविरोधात केली होती. या प्रकरणाचा निकाल आज लागला असून पुढे काय होते याकडे लक्ष लागून आहे.

बच्चू कडू यांनी मुंबईत 42 लाख 46 हजार रुपयांचा मालकीचा फ्लॅट असतानाही 2014 ची विधानसभा निवडणुकीवेळी (Assembly elections) या फ्लॅटबाबतची माहिती निवडणूक आयोगाला दिली नाही, असा आरोप बच्चू कडूंवर होता. या आरोपांवरुन 2017 मध्ये कडू यांच्या विरुद्ध गुन्हा दाखल करण्यात आला होता. या प्रकरणी तत्कालीन नगरसेवक गोपाल तिरमारे यांनी माहिती अधिकार कायद्यानुसार संबंधित यंत्रणेकडून माहिती मिळवली होती. त्यातून हा सर्व प्रकार उघडकीस आला होता.

बच्चू कडू यांनी या प्रकरणातील सर्वा आरोप फेटाळून लावले होते. राजयोग सोसायटीने सर्व आमदारांना घर उपलब्ध करुन दिले होते. त्यासाठी बँकेचे 40 लाख रुपये कर्जसुद्धा (Loan) उपलब्ध करुन देण्यात आले होते.

कर्जाची परतफेड न होऊ शकल्याने चार महिन्यांच्या आधी ते विकण्यात आल्याचा दावा बच्चू कडूंनी केला होता. त्यामुळे आपल्यावरील सर्व आरोप खोटे होते, असे स्पष्टीकरण बच्चू कडूंनी 2017 मध्ये दिले होते. या प्रकरणी गेल्या पाच वर्षांपासून सुनावणी सुरु होती. आज कोर्टाने बच्चू कडू यांना दोन महिन्यांच्या सश्रम कारावासाची शिक्षा सुनावली आहे.