ऑक्सिजन निर्मितीत राज्यात नाशिकचे क्रांतिकारी पाऊल – छगन भुजबळ

द पॉईंट नाऊ प्रतिनिधी ; कोरोना काळात सर्वत्र ऑक्सिजन टंचाई निर्माण झाली होती. ऑक्सिजन मिळत नाही म्हणून अनेकांना आपले प्राण गमवावे लागले होते. नाशिक जिल्ह्याला १३० मेट्रिक टन ऑक्सिजनची आवश्यकता होती. आज तिसऱ्या लाटेच्या पार्श्वभूमीवर जिल्ह्यात आपण एकूण ४०० मेट्रिक टन ऑक्सिजनची व्यवस्था  करतो आहोत. ऑक्सिजन निर्मितीत राज्यात नाशिकचा पहिला क्रमांक असल्याचे माहिती पालकमंञी छगन भुजबळ यांनी दिली.

भुजबळ दौऱ्यावर असतांना पिंपळगाव बसवंत येथील उपजिल्हा रुग्णालयात ऑक्सिजन जनरेशन प्लांटचे उदघाटन करण्यात आले याप्रसंगी छगन भुजबळ बोलत होते. यावेळी जिल्हा परिषदेचे अध्यक्ष बाळासाहेब क्षीरसागर, आमदार दिलीप बनकर, माजी आमदार पंकज भुजबळ, सरपंच अलका बनकर, आरोग्य उपसंचालक डॉ. पी. डी. गांडाळ, प्रांताधिकारी डॉ. अर्चना पठारे, जिल्हा शल्यचिकित्सक डॉ. अशोक थोरात, निवासी वैद्यकीय अधिकारी प्रशांत खैरे, तहसीलदार शरद घोरपडे, गटविकास अधिकारी संदीप कराड, तालुका वैद्यकीय अधिकारी डॉ. सुनिल कोशिरे, वैद्यकीय अधिकारी डॉ. सुनिल राठोर, डॉ. रोहन मोरे आदींसह रूग्णालयातील आरोग्य कर्मचारी व ग्रामस्थ उपस्थित होते.

मार्च २०२० पासून आपण सर्व कोरोनाच्या जागतिक महामारीला तोंड देतोय. पहिल्या लाटेमध्ये अचानक आलेल्या या संकटाला आपण सक्षमपणे सामोरे जात उपलब्ध असलेल्या आरोग्य व्यवस्थेवर अवलंबून होतो.  सर्वांनाच नवीन असणारा हा आजार व त्याची तीव्रता याबद्दल सर्वजण अनभिज्ञ असल्याकारणाने उपलब्ध असलेल्या साधन सामग्री नियोजन करण्यात आले. दुसऱ्या लाटेमध्ये रुग्णांची संख्याही खूप जास्त झाली होती.

देशात ऑक्सिजन वर अवलंबून असलेल्या रुग्णांची संख्या देखील जास्त होती आणि अशातच ऑक्सिजनची मागणी व टंचाई  पूर्ण राज्यभर निर्माण झाली होती. त्यातही नाशिक जिल्ह्यातील ऑक्सिजन पुरवठा करण्यासाठी उत्तम रित्या नियोजन करण्यात आले होते. मात्र काही ठिकाणी उणीव भासली होती.

मागील वर्षी नाशिक जिल्ह्यातील सर्वात जास्त रुग्ण संख्या ही जवळपास ५२ हजाराच्या घरात गेली असताना दिवसाला लागणारी ऑक्सिजन ची मागणी जवळपास १३० मॅट्रिक टन प्रति दिवसाला एवढी होती.

देशात पुन्हा तिसरा लाटेच्या अनुषंगाने रुग्णांची वाढती संख्या लक्षात घेता ही ऑक्सिजनची मागणी जवळपास तिप्पट होण्याची शक्यता नाकारता येत नाही आणि त्यामुळे आज आपण नाशिक जिल्ह्यात ४०० मेट्रिक टन ऑक्सिजन उपलब्ध असेल याचे योग्य नियोजन करण्यात आलेले आहे, असे सांगून पालकमंत्री श्री. भुजबळ म्हणाले या नियोजनामध्ये ऑक्सिजन जनरेशन प्लांट, ऑक्सिजन स्टोरेज टँक, ड्युरा सिलेंडर्स, जंबो सिलेंडर्स, ऑक्सिजन काँन्सट्रेट  ऑक्सिजनचा गरज पूर्ण करणारी सामग्री मुबलक प्रमाणात आज जिल्ह्यामध्ये उपलब्ध करून देण्यात आली आहे. अशी माहिती भुजबळ यांनी दिली.

जिल्ह्यातील २९ आरोग्य संस्थांमध्ये ऑक्सिजन जनरेशन प्लान्टचे काम चालू आहे. रुग्णालयाचे प्रकार आणि तेथे दाखल होणाऱ्या रुग्णांची संख्या लक्षात घेता तेथे ऑक्सिजन जनरेशन प्लांट म्हणजेच पीएसए प्लांट्स, लिक्विड ऑक्सिजन स्टोरेज एलएमओ टॅंक्स, २३० लि. ड्युरा सिलेंडर्स, मोठे आणि छोटे जम्बो सिलेंडर्स याचे नियोजन करण्यात आले आहे.

आमदार बनकर म्हणाले की,  कोरोनाच्या पार्श्वभूमीवर आरोग्य अधिकाऱ्यांनी अतिशय उत्तम रित्या काम केले. गेल्या दोन वर्षात कोरोनाच्या काळात डॉक्टर आणि परिचरिकांचे  योगदान मोलाचे आहे.

कार्यक्रमाचे प्रास्ताविक करताना जिल्हा शल्यचिकित्सक डॉ.अशोक थोरात म्हणाले, या ऑक्सिजन जनरेशन प्लांट ची क्षमता २० एनएम असून जवळपास ६० ते ६५ जम्बो सिलेंडर दर दिवसाला भरले जाणार आहेत. त्यांना पूरक क्षमता म्हणून ग्रामीण रुग्णालय पिंपळगाव येथे १० केएल ऑक्सीजन स्टोरेज टँक, २३० लिटरचे तीन ड्युरा सिलेंडर्स,११० जम्बो  व ८५ छोटे सिलेंडर्स आणि १० ऑक्सिजन काँन्सट्रेटर उपलब्ध करण्यात आलेले आहेत.