सर्वसामान्य शेतकरीही आता बाजार समितीची निवडणूक लढवू शकतात.

द पॉईंट नाऊ प्रतिनिधी : महाराष्ट्र कृषी उत्पन्न कायद्यात सुधारणा करण्याचा निर्णय राज्य मंत्रिमंडळाच्या बैठकीत घेण्यात आला आहे. मुख्यमंत्री एकनाथ शिंदे यांच्या उपस्थितीत मंत्रिमंडळाची बैठक झाली. त्यात हा निर्णय घेण्यात आला. त्यामुळे आता सर्वसामान्य शेतकऱ्यांनाही बाजार समितीची निवडणूक लढवता येणार आहे. या सुधारणेमुळे कृषी उत्पन्न बाजार समितीवर सर्वसामान्य शेतकऱ्यांचे प्रतिनिधित्व वाढेल तसेच कामात प्रत्यक्ष सहभागही वाढेल.

शेतकऱ्यांना कृषी उत्पन्न बाजार समित्यांच्या संचालक मंडळाची निवडणूक लढविण्याचे अधिकार देण्यासाठी कायद्याच्या कलम १३ (१)(अ) मध्ये सुधारणा करण्यात आली आहे. या सुधारणेमुळे सामान्य शेतकऱ्यांना कृषी उत्पन्न बाजार समितीची निवडणूक कृषी पतसंस्था व बहुउद्देशीय सहकारी संस्था व ग्रामपंचायत सदस्यांच्या व्यवस्थापन समितीच्या निवडून आलेल्या सदस्यांसह लढवता येणार आहे.

कृषी उत्पन्न बाजार समितीसाठी ग्रामपंचायत सदस्य आणि सोसायटी संचालक हे मतदार आहेत. कृषी उत्पन्न बाजार समिती हे राज्य सरकारने मोठ्या विक्रेत्यांकडून होणाऱ्या शोषणापासून शेतकऱ्यांचे संरक्षण करण्यासाठी आणि किरकोळ किमतीचा अतिरेक होणार नाही याची खात्री करण्यासाठी स्थापन केलेले पणन मंडळ आहे. कृषी मालाची खरेदी-विक्री सरकारने निश्चित केलेल्या कृषी मालाच्या आधारभूत किमतीपेक्षा कमी होणार नाही याची काळजी घेणे हे काम आहे.